Kasar Iraki dai tana daga cikin kasashen musulmi da suke da wuraren ziyara kana kuma masu tsarki a idanuwan al'ummar musulmin duniya, a takaice ma dai ita ce ta biyu wajen yawan irin wadannan wajaje idan ka cire kasar Saudiyya. A kowace shekara dai miliyoyin al'ummar musulmi ne musamman ma dai mabiya tafarkin Ahlulbaiti (a.s) suke kai ziyara wadannan wajaje musamman ma bayan kawar da gwamnatin kama-karya ta Saddam Husaini, sabanin kasar Saudiyya inda jikokin Sa'ud da muggan malamansu mabiya tafarkin wahabiyanci suke hana al'umma ziyarta irin dimbin wurare masu tsarki da suke wajen face 'yan kadan din da suka rage su din ma dai cikin sanya ido, don kuwa da dama daga cikinsu 'ya'yan gidan Sa'ud sun ruguza su.

Don haka abin da ke biye takaitaccen bayani ne kan irin wadannan wajaje masu tsarki da suke Iraki, gari bayan gari:

      1- Najaf al-Ashraf:

1- Haramin (hubbaren) Amirul Muminina Ali (a.s), Imamin Gidan Manzon Allah (s.a.w.a) na farko.

A wannan guri akwai kaburbura kamar haka:

• Kabarin Amirul Muminina Ali (a.s).
• Kabarin Annabi Adamu (a.s) Annabi kuma mutum na farko a bayan kasa.
• Kabarin Annabi Nuhu (a.s).

2- Makabartar Wadi'us Salam

Wannan makabarta ce da aka bisne Manyan Annabawa da bayin Allah daban-daban, daga cikin wadanda suke kwance a wajen har da:

• Kabarin Annabi Hudu (a.s).
• Kabarin Annabi Salihu.
• Musalla na Imam Zainul Abidin (a.s), limamin Ahlulbaiti na hudu.

3- Kabarin Kumail bn Ziyad (r.a.) daya daga cikin sahabban Imam Ali (a.s).

4- Kabarin Rashid al-Hijri (r.a.), daya daga cikin sahabban Imam Ali (a.s).

5- Masjid Hannana: Wannan wani masallaci ne da ke tsakanin Kufa da Najaf, dalilin daukakan wannan masallaci kuwa shi ne an ruwaito cewa lokacin da Imam Hasan da Husaini (a.s) suka dauko jikin Imam Ali (a.s) mai tsarki bayan shahadarsa sun tsaya a wannan masallaci. Sannan kuma an ce an bisne wani sashi na fatar kan Imam Husaini (a.s) a wajen.

      2- Karbala:

1- Haramin Imam Husaini (a.s), jikan Manzon Allah (s.a.w.a) kana kuma limamin gidan Manzon Allah (s.a.w.a) na uku.

A cikin wannan harami akwai kabarurruka kamar haka:

• Kabarin Imam Husaini (a.s).
• Kabarin Aliyu al-Akbar, dan Imam Husaini (a.s).
• Kabarin Aliyu al-Asghar, dan Imam Husaini (a.s).

2- Haramin Abul Fadhl al-Abbas, dan Imam Ali kana kanin Imam Husaini kuma mai rike da tutarsa (a.s).

3- Kabarin Habib bn Mazahir, daya daga cikin sahabban Imam Husaini (a.s).

4- Kaburburan sauran shahidan Karbala da suka yi shahada tare da Imam Husaini.

5- Kabarin Ibrahim, dan Imam Musa al-Kazim, limami na bakwai (a.s).

6-Lambun Imam Ja'afar al-Sadik, limamin Ahlulbaiti na shida (a.s).

7- Lambun Imam al-Asr (ATFS)

8- Hubbarren Hur bn Yazid al-Riyahi, daya daga cikin sahabban Imam Husaini (a.s), kimanin kilomita uku daga Karbala.

9- Hubbaren Aun, dan Sayyida Zainab, 'yar'uwar Imam Husaini (a.s), kimanin kilomita shida daga Karbala.

      3- Kufa:

1- Masallacin Kufa.

A cikin wannan guri akwai:

• Mehrab al-Ibadat (wajen da Ibn Muljam - la'anar Allah ta tabbata a gare shi - ya sari Amirul Muminina Ali (a.s).
• Kotun Amirul Muminina Ali (a.s).
• Hubbaren Muslim bn Akil, manzon Imam Husaini (a.s) zuwa Kufa.
• Hubbaren Muktar, wanda ya mike don dauko fansar jinin Husaini (a.s).
• Hubbaren Hani bn Urwah, sahabin Imam Husaini (a.s) wanda Ubaidullah bn Ziyad ya kashe shi saboda ba da masauki wa Muslim bn Akil.
• Wajen da ruwan dufana na Annabi Nuhu (a.s) ya fara.

2- Gidan Amirul Muminina Ali (a.s).

3- Hubbaren Sayyida Khadija al-Sughra, 'yar Imam Ali (a.s).

4- Hubbaren Annabi Yunusa (a.s), kusa da bakin kogi.

5- Masjid al-Sahla. A wannan wajen akwai:

• Musalla na Imam Ja'afar al-Sadik (a.s).
• Musalla na Annabi Ibrahim (a.s).
• Musalla na Annabi Idris (a.s).
• Musalla na Annabi Khidr (Halliru), ana kiran wajen da Makam al-Salihin.

6- Hubbaren Maytham al-Tammar, sahabin Imam Ali (a.s).

7- Masallacin Zaid, kusa da Masjid al-Sahla.

8- Masallacin Sa'asa'a bn Sauhan, sahabin Imam Ali (a.s).

      4- Kadhimayn (Kazimiyya):

1- Hubbaren Imam Musa al-Kazim da Imam Muhammad al-Jawad, limaman gidan Manzon Allah (s.a.w.a) na bakwai da tara (a.s).

Baya ga wadannan Imamai (a.s), akwai kuma manyan malamai da aka bisne a wajen irin su Shaikh al-Mufid mawallafin shahararren littafin nan na al-Irshad, da kuma Sayyid Murtadha da kuma Sayyid Radhi.

      5- Samarra:

1- Hubbaren Imam Ali al-Naki da Imam Hasan al-Askari., limaman gidan Manzon Allah (s.a.w.a) na 10 da 11 (a.s).

Hubbaren dai yana dauke ne da:

• Kabarin Imam Ali al-Naki (a.s).
• Kabarin Imam Hasan al-Askari (a.s).
• Kabarin Sayyida Halima Khatoon, diyar Imam Ali al-Naki (a.s) kuma unguwar zoman Imam al-Mahdi (a.s).
• Kabarin Sayyida Narjis, mahaifiyar Imam al-Mahdi (a.s).
• Makam al-Ghayba ko kuma wajen da aka ga Imam al-Mahdi (a.s) gani na karshe kafin ya shiga ghaybah (buya).
• Masjid al-Jami'.

      6- Bagadaza:

1- Akwai kabarurrukan wakilan Imam al-Mahid (a.s) na musamman lokacin karamar buyarsa (Ghaibat al-Sughra), su ne kuwa:

• Usman bn Sayyid.
• Muhammad bn Usman.
• Ali bn Muhammad.
• Husain bn Ruh

2- Kabarin Kambar, bawan Amirul Muminina Ali (a.s).

3- Kabarin Shaikh al-Kulayni, wanda ya rubuta littafin al-Kafi.

      7- Mada'in:

1- Kabarin Salman al-Farisi, sahabin Manzon Allah (s.a.w.a).

2- Kabarin Hudhaifa bn Yaman, sahabin Manzon Allah (s.a.w.a).

3- Kabarin Jabir bn Abdullah al-Ansari, sahabin Manzon Allah (s.a.w.a).

4- Masjid al-Jum'a, kusa da kabarin Salman al-Farisi.

      8- Basra:

1- Masallacin Amirul Muminina Ali (a.s).

      9- Hillah:

1- Kabarin Kasim, dan Imam Musa al-Kazim (a.s).

2- Kabarin Annabi Ayyub (a.s).

3- Kabarin Annabi Daniel (a.s).

4- Kabarin Annabi Zulkifl (a.s).

      10- Musayyab:

Wannan waje yana nan ne tsakanin Karbala da Kazimiyya, kuma a wajen ne hubbaren 'ya'yan Muslim bn Akil guda biyu, wato Muhammad bn Muslim bn Akil da Ibrahim bn Muslim bn Akil suke.