Babu shakka bayyanar Mahdi mai kawo gyara, na daga cikin manyan abubuwan da za su faru a tarihin dan’Adam, don haka ne Manzon Allah (s.a.w.a) ya sanar da al’ummarsa abin da Allah Madaukakin Sarki ya sanar da shi na bayyanar wannan mai babban mai kawo gyara. Hakika Manzon Allah (s.a.w.a) ya nusar da al’ummarsa kan wannan lamari da kuma umurtansu da su yi imani da shi da kuma binsa a lokacin bayyanarsa a matsayin mai kawo gyara, wanda zai yi aiki da littafin Allah da sunnar ManzonSa (s.a.w.a), wanda kuma zai jagoranci al’umma zuwa ga tafarkin shiriya da aminci, ya ruguza gumakan jahiliyya da kuma karkatattun ra’ayuyyuka.

Don kusato da wannan akida ta buya kusa da hankulan mutane, Manzon Allah (s.a.w.a) da Imaman Ahlulbaiti (a.s) sun yi ishara da wasu alamu na bayyana, wadanda za su yi nuni da kusatowan wannan lokaci.

To sai dai kuma yana da kyau a fahimci cewa makiya sun yi kokarin sanya ruwayoyi na karya cikin ruwayoyi na hakika da suka yi magana kan Imam al-Mahdi (a.s) da kuma alamomin bayyanarsa, don haka akwai ruwayoyi na karya da aka sanya a wannan bangare, wadanda yana da kyau a kula da su.

Ruwayoyin da suka yi ishara da batun bayyanarsa (a.s) sun yi ishara da nau’oi guda biyu na bayyana, wato: Alamomi na zamantakewa da kuma alamomi na dabi’a.

Alamomi na zamantakewa dai sun hadu ne a kan:

1- Yaduwar zalunci da babakere.

2- Samun ikon jahiliyya da kuma bayyanar dabi'u na jahiliyya da kuma akidojinta.

3- Ci gaban ilmi mai girman gaske.

4- Faruwar yake-yake da fitinu kala-kala bugu da kari rashin aminci da zaman lafiya.

5- Bayyanar makaryata,  masu da’awar kawo gyara.

6- Tsadan kayayyaki da lalacewar tattalin arziki.

7- Bayyanar masu sadaukarwa da ba da kawukansu wajen jagorantar kungiyoyin kawo gyara.