An haifi Imam Hasan bn Aliyu al-Askari ne a garin Madina al-Munawwara a watan Rabi al-Thani shekara ta 232 hijiriyya, kuma ana kiransa da al-Askari ne saboda wurin da suka zauna tare da mahaifinsa Imam al-Hadi (a.s) da ake kira da Al-Askar (barikin soji) a Samarra.

Imam al-Askari (a.s) dai ya rayu da kuma girma ne karkashin kulawar mahaifinsa Imam al-Hadi (a.s) wanda ya mallaki ilmi, gudun duniya, jihadi da kuma aiki da ilmin da yake da shi, inda ya gaji dukkan wadannan abubuwa daga gare shi. Ya rayu da mahaifinsa na tsawon shekaru ashirin da uku da ‘yan wasu watanni, inda ya zamanto mai kokarin gyara al’umma da tabbatar da su bisa tafarkin gaskiya kamar yadda iyaye da kakanninsa suka kasance.

Ruwayoyi daban-daban sun tabbatar da imamancin Imam al-Askari (a.s) tun lokacin mahaifinsa al-Hadi (a.s). Bari mu kawo wasu daga cikinsu kamar yadda Shaik al-Mufid ya kawo:

“Abubakar al-Fahfaki ya ce: Abul Hasan (al-Askari) (a.s) ya rubuta min cewa: “Dana Abu Muhammad shi ne mafi ingancin zuriyar Manzon Allah, mafi tabbatacciyar hujja, shi ne babba daga cikin ‘ya’yana, shi ne mai gado, kuma shi ne bangon hukumcin Ahlulbaiti, ka tambaye shi dukkan abin da kake tambayana, don kuwa yana da dukkan abubuwan da kake bukata^([1])”.